BREAKING NEWS, WANANCHI WAVAMIA KITUO CHA POLISI KIBITI RUFIJI, Wanaendelea kuteketeza nyumba za askari kwa moto mida hii.

Habari iliyotufikia hivi punde inaeleza kuwa kundi kubwa la wananchi wenye hasira kaliWilayani Rufiji leo wamevamia kituo cha Polisi Kibiti Wilayani humo na kuanzisha vurugu kubwa kufuatia raia mmoja mkazi wa kijiji hicho kudaiwa kufa kwa kile kilichodaiwa kuwa ni kutokana na kipigo cha Polisi.
 Chanzo chetu cha Habari kutoka Kibiti kinatupasha kuwa, kijana huyo aliyefariki kutokana na kipigo hicho afahamikae kwa jina la Hamis Mpondi ambaye mauti yamemfika wakati akipatiwa matibabu katika Hospitali ya Taifa Muhimbili,jijini Dar es Salaam na taarifa hiyo ilipowafikia wananchi hao ndipo wakachukua uamuzi wa kwenda kituoni hapo na kuanzisha vurugu hizo.
Habari zaidi zinaeleza kuwa, hivi sasa wananchi hao wanateketeza nyumba za Askari Polisi hao zilizopo jirani kabisa na kituo hicho, licha ya juhudi za Polisi kuwatawanya kwa mabomu kuendelea kufanyika.
Aidha wananchi hao wameanza kufunga barabara kuu ya Kilwa iendayo Mikoa ya Kusini, Lindi na Mtwara kwa mawe, magogo na kuchoma matairi ikiwa ni umbali wa kama kilometa moja kutoka kituo cha Polisi Kibiti.
Inaelezwa kuwa hali imezidi kuwa tete katika eneo hilo huku Polisi wa Kibiti wakiendelea na jitihada za kudhibiti hali hiyo kwa kufyatua mabomu ya machozi hewani kujaribu kutawanya umati huo wa watu.
tutaendelea kupeana taarifa zaidi kadri zitakavyokuwa zikitufikia.